Dos meses pasanon dende la última entrada que feixe nesti blogue. Pues teo que dicir que nun yía casualidá, que tardara tanto. Más que nada, esto yía pola catarsis que ta provocando la crisis, esi ver cumo esfana'l sistema, pero ellos siguen agarraos... Ya d'ente la xente del común -porque PP ya P$OE tán ehí porque la xente los votóu, ta claro- los que-ys aplauden. Siempre touve la sensación de qu'esa xente cuando los xustifica, han tener la sensación de beber un vasu piedras, pero claro, queda todo nuna sensación.
Pero bono, por nun falar de la crisis (¿Ou sí?) vou referime a cúmo güei chanon del Congresu al deputáu Joan Tardà por falar catalán.
Ya paezme tremendo. Velehí la discriminación real del Reinu d'España a tolo español diferente. Porque'l catalán yía una llingua del Reinu. Yía más, si Cataluña saliera d'España, siguiría falándose catalán en Valencia ou n'Aragón ou nas Isllas Baleares.
Claro que, tamos mui avezaos a todo esto. Asina yía, Meixan purriba nós ya dicimos ¡Chueve! Porque a la xente-y paez normal lo que yía una contradicción: Si una familia en Cataluña pide qu'al sou neñu-y puengan escuela en castellanu, el restu la clas vei tener escuela en castellán, pero si toca al rovés, ya piden falar en catalán ya que'l restu pase.... entós non.
Bien yía verdá que catalán ya castellán son las llinguas oficiales de Cataluña -sacante d'Arán, au tamién yía oficial l'occitanu; ya nel restu d'España yía castellán ou castellán más outra... Ya n'Asturias yía oficial el castellán ya ésta na qu'escribo ta protexida, ou regulada ou dalgo asina, que bono, yía l' status que pidirían pal catalán dalgunos, ya entós pa outros esti status yía por demás.
Tola vida me paecéu lo mesmo. Porque de xuru, sufríu llector que gastas tiempu (ya visión) en lleer estas paroladas, tarás pensando cousas cumo "¡Ai Mamina! ¡Qué chorrada! ¡Qué manera de perder el tiempu! ¡Cola de cousas más importantes qu'hai na vida!"; ya ehí yá metimos la patona.
Nesta Montaña que yía'l Mundu Civilizáu, l'Orde, El Vivir nun Mundu siquiera un poucoñín Meyor, cousas cumo ésta forman el primer pasu. Porque ési yía'l purmeiru, que vei llevanos a todos cara recortes en prestaciones sociales, ya a un mayor emprobecimientu. Porque'l llamáu Interés Común cadún presentalo cumo-y más interesa (pero ehí nun xeitu individual).
