Especial Elecciones Nacionales 25M (II)

Vaaaaaaya!!!

Lo que tevo que pasar, ¿eh? Pero al final, ¿eh? L'Home-Llobu, ehí lu tenéis. Pensé que tampoco d'esta, pero non. Y non, nun ye que la cosa sía tampoco pa ¡Uuui, meca, ehí va d'esta! Non, que naide nun se faiga ilusiones. Pero, ehí, ehí.

Y la cosa vien porque Llobeiru -bono, Llobeiru non, na F$A meyor dicho- ta apurando les sos posibilidaes cara los comicios nacionales, les nueses elecciones. Conque ehí punxenon nel so programa electoral una orixinal redacción d'ún de los sos artículos "pa los del bable".

¡Ai, Mamina!

Sospriende ver, sí amiguinos, esta noticia. Y pensar, como se verán ellos, l'ala más xacobín y antiasturianu del PSOE, pa meter esta redacción nún de los sos artículos, a la hora de tratar l'asuntu llingüísticu.

Qué sí hom, ye un artículu mui abiertu, ye "l'apoyu" que-y da la FSA-PSOE, y eso, pero llama l'atención.

Al Lobis-home tien que-y pruyir, pero que se metiera al so trabayu de péritu y non a la política, entós.





Ta claro qu'agora, per otru llau, n'Asturies volvemos xugar col futuru de la sanidá y la educación y los servicios públicos. Y como nes anteriores elecciones autonómiques ponemos en xuegu'l modelu de país: O semeyanos a Valencia y/o Madrid o tirar per otru camín.

Instalar copagu sanitariu, deteriorar el sistema de sanidá públicu asturianu (tamién podíamos falar equí de Cataluña), poner la rede d'hospitales y medios del SESPA en manes de xestores privaes... Lo mesmo que na Educación.

El Dóberman yá la entamare cola RTPA, y non.

Personalmente nun toi a favor d'esta RTPA, la RTPA de la FSA-PSOE. Y nun toi por:

-RTPA sólo tien razón de ser si se manda única y esclusivamente de la llingua asturiana (y gallego-asturiana).

-RTPA sólo tien razón de ser si sirve pa crear emplegu y una industria audiovisual, con producciones, empreses, trabayadores y recursos n'Asturies; o na midida de lo posible,  principalmente n'Asturies.

-RTPA sólo tien razón de ser si apurre conteníos globales; pero tamién si recuéi nes sos emisiones el mayor númberu d'opiniones y puntos de vista.

-RTPA sólo tien razón de ser si procura la busca de la mayor calidá na so programación, nos sos conteníos y nos sos medios.

-RTPA sólo tien razón de ser si tien vocación de mediu públicu y asturianu, finalmente. (Y obviamente, ensin mamonéu nin caciquismu nin duerna).


El modelu de televisión que quier el Dóberman y el Perru-Pastor que presenta'l PP (ellos llámenla Cherines) ye'l que tienen los cazurros pa Castiella y Lleón; bono, igual pa ellos ta bien; pero lo que vien siendo pa nós, pa los asturianos, non.

Nós nun queremos una tv que sirva pa los fines propagandísticos que sirve TeleCazurra; una tv en teoría non venceyada al poder, pero na práctica vecera y vocera del mesmu; una tv que lo mesmo podía valir pa Madrid, que pa Murcia que pa Segovia; una tv que nun rinde cuentes a naide, pero amerita'l nome d'autonómica como si tal fora.


Pues el Dóberman y la Perru-Pastor van per esi camín. Ési, y non otru, ye'l so fin pa la RTPA.


Dios nos llibre... de TeleCastiella.