Acaba l'añu!

Acaba l'añu, y esperemos qu'esti nuevu 2012 nun seya peor que'l 2011.

2011 Foi l'añu en que los mafiosos más aprovecharon de la crisis. Velehí'l casu Urdangarín, cola so fundación prehí arrasando colos cuartos públicos, y ayer (30/12/2011) entá sentí pola mañana al periodista Carlos Herrera d'Onda Cero defendendo la Monarquía Borbona, colos sos secuaces de tertulia.

Foi l'añu de la Victoria y la non tan grave derrota del PP y el PSOE, respectivamente. De magar la xente pidía un cambéu, pues non, nun hebo tal cambéu. Eso sí, esperemos que quede daqué...

N'Asturies hebo'l nuesu particular cambéu, cola llegada del Dóberman, y la prestosa xebra "PODER- La Nueva España", que foi un poco como la ruptura de la Revolución Francesa, pero a nivel nacional.

Tevimos el nuesu casu de corrupción, colos almacenes Ígrafo y Pumarín, y col Conceyeru na cárcel. Foro Asturias, que son otres sigles estremaes de PP y PSOE, gobierna Asturies.

Pero bon, a lo que vamos, nes eleiciones d'España ganó Rajoy, y vien cargáu con recortes bultables en prestaciones y xuba d'impuestos.

Con un paro del 20% aproximadamente, con ún de los salarios mínimos más baxos d'Europa (per detrás d'Italia, Grecia y la Irlanda), España afronta la crisis, nesti añu 2012 con un panorama curiosu...



¡Ai neños, escaezseme, como a los Mass Media del poder dicir que los recortes van (o vamos) sufrir(ilos) los de menos recursos, los probes, los débiles, la xente más de la cai!. Sí, esto nun lo diz, por exemplo Carlos Herrera. Habrá que velo, pero supongo que pa la banca o pa los constructores o les eléctriques heba perres. Si non... Eso sí que prestaba ver.

¡Ah, y la xuba d'impuestos tamién va entamar per debaxo, peles rentes baxes! Presumiblemente, hai qu'apretase'l cinchu, equí hai que tributar más, pa ver si lleguen les pensiones y les axudes a la gran industria capitalista.

Conque Feliz Añu 2012, que, polo menos, traiga salú. Y Ánimu, que vamos precisar abondo.

(Troquen, por favor, ETA por Crisis Económica, y por Policia de Rubalcaba, PP-PSOE. Munches gracies. Ye lo que tien ser un melandru de la Internet)

FAC amorecéu con UPyD

Cumo comer un par de morciellas, tovía toi repitiendo la noticia: FAC xuntóu cola UPyD pa facer un grupu parllamentariu nel Congresu de los Deputaos.

Con UPyD. El partíu nacionaliegu español. El que más fai por escluyir las identidades nacionales que conforman l'Estáu Español. El partíu más glotocida, pa colas llinguas minorizadas. El partíu que, en definitiva, escuendese siempre na sua defensa del nacionalismu español.

Buó, pues ehí van los intereses d'Asturias. La voz d'esti país. Vei prestar ver a Rosa Díez falando de los problemas de tolos asturianos. Anque bono, en realidá nun vei poder, porque nuna miesma intervención yía bien difícil defender Asturies mentres s'ataca Catalunya ya Euskal Herria... por nun falar d'Andalucía, Castiella, Aragón ou Galicia, ente outros.

Cuando dende LNE anunciaban que FAC yera yá una cousa cásique cumo'l PNV, pues, mirái p'allá, son más españolistas que'l PP. Bono, prehí. ¡Qué vergoña! ¡Áu tarán agora aquellos! Yía más, ¿úlos los asturianistas que los apoyanon?

A tomar por culu hom, con tola tropa aquella de Fernando Savater, Rosa Díez, Álvaro Pombo... etc.

¡¡¡Los asturianos tamos cumo Fesorias!!!

¡¡¡Ya lo peor yía qu'agora se dan cuenta!!! ¡¡¡Ái mamina!!!

Ya que lo tengan que dicir en Madrid, colo opresores ya españolistas que son prehí, mundu alantre, qu'en pasando'l Negrón son toos unos españolistas ya unos opresores....

Pero bono, a lo que vamos. Vei dica pouco p'atrás qu'una deputada de la Xunta Xeneral, tres ver los resultaos electorales dixera dalgo rellativu a la intelixencia del común asturianu.

Pues agora en Madrid feixenon un estudiu, ya lleganon a la conclusión que los neños de la que salen de la escuela nun saben facer nada. Vaya que salen cumo pollinas. Que si nos patios de los colexos d'Asturias caeran albardas nun pega una en suelu, ya nun se salvan nin los gatos. Que yía una perda tiempu la prédica, porque nun-ys vei quedar nada, ya lo peor yía que yá lo sabemos.

Porque somos frutu, somos productu de la Escuela Asturiana.

You, sicasí, sou un rapaz de mundu, conozo casi tolos conceyos d'Asturias, ya eso tien que notase. Asina que vou poner una solucción, a ver que-ys paez.

Hai que se reciclar. Hai que tornar al Institutu ou a las escuelinas, a repasar. Pues sí. Conociemientu del Mediu. Las matemáticas. La llingua (asturiana, española ya tamién la inglesa). Xeografía, ya Hestoria. La Física, ya la Química. P'alantre.

Porque llou somos las más burrinas... Qu'eiquí darréu solo salen futbolistas ya pilotos de Fórmula 1 ya directivos de la SGAE.

Lo que me llama a pensar: ¿Cúmo yía qu'eiquí n'Asturias nun salen tantos famosetes cumo pa la parte d'Andalucía ou Estremadura, ou outras partes d'España?

Por cierto, esta actriz estremeña, Bebe, que cuspíu a los periodistas... ai, pues falando de Madrid traime a la memoria un camellu que viera nel zoolóxicu... Nun digo más

Invertir en Villa Magdalena

¡Ai, qué pena que yo nun tenga cuartos!

Y nun digo, por nun tener cuartos, tener cinco euros nel bolsu pa tomar una pinta, non, sinon que nun teo, qué sé yo, dalgún millonzacu d'euros, pa meter en Villa Magdalena, porque pa min que ye la inversión del momentu nesti país.

Porque aquello tolos meses se revaloriza. Mete miéu pa la cabeza.

Cuando se pague Villa Magdalena va nacer una nueva clase de nuevos ricos n'Asturies con toles frivolidaes d'el xéneru ési. ¡Qué pena nun nacer antes! ¡Qué pena nun ser más ricu pa meter los cuartos ehí!

Agora, que ta mui guapu'l tema la política capitalina. Pero ye como too nes ciudadaes cortesanes... Siempre coles sos intrigues y les sos coses d'Alta Sociedá, que yá cuando llegua ún a Trubia o por exemplu a Grau, o a L'Escampleru, eso ye yá otru mundu.

Y digo esto porque los conceyales Caunedo y Mesa cási lleguen a les manes (vaya, por nun dicir que cásique anden a hosties pela Casa Conceyu) ehí l'otru día. ¡Ai, pues nun diba prestar poco!

Y con eso y too que la cosa vese que va pa tiempu. Yo mandába-yos a llantar ocalitos, que nel Conceyu d'Uvieo nun sé aínda si hai, y tienen que dase bien, y amás son unos árboles que relaxen muncho a la vecería... y nesti casu igual tamién a esos dos conceyales, si nun s'anden turriando tamién pel monte arriba, de la que tán derrompiendo (l'ún) y tamién llabrando (l'otru)... ¡Ái, Dios los viera!

Las Novedades Anunciadinas

El Banc Sabadell, que yía propietariu del bancu Herrero, con fuerte implantación nel país, mercóu por un euru la caxa del Mediterraneu. La CAM.

Sí, séilo de primer mano porque pidienonme l'euru a min. Ya you adelanté-yslo ¿aclaráu?

Por outru llau, pa la xornda de Copa del Rei vien l'Athletic de Bilbo, ya pueden dar gracias que nós somos un equipu republicanu. Ya ta bien, porque Uradangarín tamién yía republicanu. Ou eso ou yía mediu fatu.

Pero'l Rei yía monárquicu, arriendes d'españolista ya opresor. Ya cumo ésti sí que nun yía tan fatu, entós quitóu-ys la subvención a las infantas ya con ellas a Urdangarín. ¡Ai, que bien que por fin llegan las mididas d'austeridá a la familia real!

El presidente del Estáu Español yía noticia, porque vei reunise con Merkozy.¡Non! Yíalo porque'l presidente español llámase "Mariano".

La banca española precisa 26.200 millones adicionales, pero cumo me diou al lleer un shock nun sabría dicir si los precisan de pesetas ou d'euros. Pero si touviera d'apostar, entós tiraba por "dólares". A ver si sacaba dalguna migaya d'esta feliz noticia...

¡¡Rectificación en 24 horas de la Casa Real del Estáu Español!! Las Infantas, ya con ellas Urdangarín, volven chupar del tetu.

Ya agora p'acabar, una noticia amable: Asturias foi nesta IX llexislatura de las poucas comunidades que nun touvo nengún problema col Estáu [conflictos ente autonomías ya estaos]. ¡¡¡Mete miéu pa la cabeza!!!

O lapis do Carpinteiro

Esto tien que ser apostar pol cine na llingua propia, d'un país pequenu, polos artistes de so, y polos guionistes/escritores.

O Lapis do Carpinteiro, con Tristán Ulloa, Carlos Blanco... Antón Reixa, Manuel Rivas... y más entá.

¡¡¡L'Arzobispu pide'l votu nes eleiciones p'Andecha Astur!!!

Sí, amiguinos, paez increyible, pero non talo; nel día d'ayeri, al arzobispu d'Asturies (Lleón, Santander y la parte'l Bierzu) dio-y por arremangar la sotana, y meter los píes nos folleros de la política, cosa que nos tien yá avezaos.

Y ¡oh cielos! ¿quieren creyer que-y dio por pidir el votu pa la formación marxista de lliberación nacional Andecha Astur? Sí, pero non pal sector qu'agora acorica pa cola coalición Bloque-Unidá Nacionalista, sinon que tiró pol sector duru, por Andecha Astur.

Bono, bono, velehí la noticia. Les males llingües, afilaes y daes al llevantu, dicen que, nos sos ratos d'asuelu, so señoría posa la sotana y anda pela capital de pañuelu palestín, y tiénenlu visto peles concentraciones del movimientu 15M; o como a elli más-y presta XV M, por caltener la cosa papal.

Ente quien lu conoz (el so círculu más cercanu) paez ser que tamién amuesa les simpatíes pol Partíu Comunista de los Pueblos d'España, pero como'l Fary fora militante, pol tema la farándula, Monseñor nun termina pidir el votu pa esta otra formación.

Habrán decatase que les opiniones de Sanz Montes caltrieron ente la sociedá, como nun podía ser d'otra miente. Dende la esquierda, los ecoloxistes, les feministes, los paraos, el movimientu llaicu (chocante) y el nacionalismu les palabres del arzobispu prestaron, y dalgún llaicu hasta cunten "que pidió que lu volvieren apuntar a la Ilesia" (boutizar). Dende la drecha, prágmatica y con valores d'empresa privada como la  eficiencia, glayaron "¡Amén!".

Ah, ¡Qué gran trabayu ta faciendo Don Jesús! Aquello foi venir y consolidar la Sacra Institución... Tenemos la Ilesia más moderna d'Europa; ye una ruptura dafechu con aquella Ilesia meticona de la Edá Media [Dende la cayida del Imperiu Romanu hasta la muerte de Franco, of course].

A ver cuando lu vemos prehí peles cais, col pueblu humilde y cenciellu, como Xuasucristu, ehí mano a mano colos probes. ¡El nomatu de pila yá lu tien!



Pd: Xuasucristu fora carpinteiru. Significativamente Don Jesús foi broker. Y anda de sotana. Blanco y en botella.

El Peñón ye un peñón

¡Cúmo-y presta al Dóberman exercer de nacionaliegu! Lo que pasa yía qu'agora vei camín de Madril ya xúbe-y el fervor, conque cumo agora yía asturianista ya, por supuesto, españolista -lo cual presta- pues entós tira pa los dos llaos.

Él, de la qu'anda por provincias agora da-y por poner el monu patrioteiru ya agora pide prehí Xibraltar, la colonia inglesa na Península Ibérica.

A min talo me da la verdá. Por min que lu lleven, si tanto-ys presta ya-ys pruye. A min que conste que nun se me perdéu nada prehí. Ya a la mayoría d'Europeos que nun sían españoles tampouco-ys da muncho más aquello, ya que tamién dicen: "¡Cuoñu! ¿Nun tienen n'España Ceuta ya Melilla, ho?" Entós prehí solidaridá, cero.

Ai non, pero yía que son cousas estremadas, porque Ceuta ya Melilla nun son colonias, sinon Ciudades Autónomas, cousa distinta. Anque bono, en Xibraltar tampouco papanon a Franco, conque bon avíu-ys fizo aquello de ser británicos.

Pero sí ho, el Dóberman anda prehí esprecetáu, llen de fervor patrioteiru... Sona que lo próximo vei ser pidir colocar l'aigla nel escudu español. You nun séi, pero yía lo que podamos ver nas próximas eleiciones, si sal Sotres escoyíu pa Presidente del Estáu Español.

Nós, yá tenemos el nuesu peñon, el Cabu Peñes. Ou tamién ta Xixón, que tien Cimavilla, que nun deixa ser una especie de Peninsulina. Ou Tinéu, que yía un peñón tamién, sobre too pol fríu.



You garraba al Dóberman ya mandábalu pa Xibraltar, pa colos monos, a facer recaos. ¡Hala!

A vueltes col Senáu

Presten sentir les palabres d'Esther García, candidata al Senáu pola coalición Izquierda Xunida d'Asturies, pidiendo seriedá pa cola cámara territorial, pero pidiéndo-yla cara los propios candidatos, por mor de la dinámica de "dir al Senáu como retiru guapu".

Llamolos, concretamente, vividores, y refirióse a Tini Areces y al sobrín de Tía Nemesia, Isidro Fernández Rozada.

Pa Foro pa qué falar...

Nun artículu de la revista Atlántica XXII d'esti mes de Payares de 2011 hai un artículu que fala precisamente d'esto, del costu del Senáu, robláu pol periodista Jesús González, col títulu -sintomáticu- ¿Pa qué val un Delegáu del Gobiernu?

Conque resulta ser que ye verdá. Cuesta más al erariu estatal el sistema (que llembra a la dómina franquista) de delegaciones y  subdelegaciones del Gobiernu per toles provincies y autonomíes que'l Senáu, escoyíu col votu.

Pero claro, ehí apruz l'espíritu del nacionalismu escluyente español, centralista y señardosu del falanxismu. Non a un estáu descentralizáu que reconoza les distintes nacionalidaes (como Asturies) y sí al estáu centralista colos funcionarios puestos a deu dende Madrid (como na dómina de la funesta Provincia de Oviedo).


Asina somos nós.

La Traxedia Griega

Pues non, nun vou falar de Grecia, magar que pol títulu encartiara'l tema. Sí, pero ¿Pa quéi? Agora vei venir Venizelos a iguar, ya'l paciente contribuyente griegu, sí ho, el probín de siempre, a ési dan-y pol culu, valga'l chiste fácil.

Pero non, por ganas tocaba a la familia real, porque Urdangarín amerítalo, por lladrón ya sinvergüenza. Axallá-y medraran las oureas outru tantu...



Vou falar d'Italia, non obstante. Italia, que tien problemas, pero eso pasa-ys por tener de presidente a un muñecu cumo Berlusconi, un bufón (fartucu de millones, pero bufón al fin).

Ya presta (ente cominas, claro, porque prestar, lo que diz prestar nun presta nin res, más bien mete miéu) ver cumo Italia taba, efectivamente, peor qu'España. Ya, dende eiquí, reto a que Francia inda igual vei antias que l'Estáu Español, anque cumo entre Rajoy ou Rubalfaba nas próximas eleiciones (ou siga Jose Luís Rodríguez El Puma Zapateiru entós igual nun apuesto nada, anque bono, pa min l'artista que tienen ehí, Sarkozy (que cada día se m'asomeya más a Aznar) igual nos sorpriende ya qué séi you la qu'arma....

Pero sí, Italia que fou nel sou día escluyía polas Axencias de Valoración ésas que las había que declarar... [Vou callar nun vaiga escribir una burricayada] del grupu de los PIGS, pues amirái si nun yera PIG.... PIG ya outru tantu más.

Pero sí ho. Tán ehí por méritu propiu. ¿Qué pensaban que yera sólo poner ehí a Berlusconi? Non. Italia yía un país con una delda pública atroz, pero claro, ellos yá dicían "La delda pública italiana yía col propiu sector priváu Italianu". Pero delda al fin ya al cabo, que dicían aquello ya ún quedaba pensatible.... ¿Qué más dará debe-y a un puntu asturianu qu'a outru que sía vaqueiru? Pero non, pa las eficientes axencias de rating tal-y paez que non. Claro que you tampouco estudiéi ()nin en Harvard nin en Chicago... Por nun dicir que de la que lleo de siguío un ratu entama doleme la cabeza cousa bárbara.

Taba claro qu'Italia diba antias qu'España, porque son tovía más vainas que nós.

Tamos yá en tiempu (ya añu) de recoyida de mazana ya de mayar. You a Il Cavalieri facía-y tragar dos llitros de sidra'l duernu (d'una sentada) ya con eso yá-y daba'l perdón.

Eso sí, nun me responsabilizo de los posibles efeutos secundarios (si los hai).

Debate de la Vacallouria

De guaḥe siempre tevi un problema. Bono, mui de guaḥe. De guaḥín más bien.

Mio pái ensiñome a cazar grillos. Y la siguiente vuelta, salí yo sólo. Y con tolo que volví, foi con vacallourias.

Por supuesto, cuando-y amosé les vacallourias a mio pái él rió, y dixo que soltara eso. Y mio mai esplicóme la diferencia ente grillu y vacallouria.

Poro, agora mesmo toi sintiendo l'alcuentru en La Sexta ente Rajoy y Rubal-faba. Y siéntome identificáu. Porque falen de la crisis, pero eso ye como salir por grillos y venir con vacallourias. Son parte de los gobiernos que llevanon el país antes, metanes y demientres la crisis. Pero dambos los dos preséntense como la Solución a la crisis.

Home, a min de guaḥe les vacallourias [a estes altures dicir que non, nun conozo la palabra n'asturianu normativu estándar] paecíenseme a los grillos en que yeren negres y andaben pelos praos. Pero yá vía que los dos insectos, anque paecíos, nun yeren grillos, finalmente. Conque tal-yos paez (a Rubal-faba y a Rajoy) que tán como yo taba, si entá piensen que, homew...

...Bono, y llueu tamién dicir que nun se vos ocurra meter na grillera coles vacallourias saltapraos y cigarres, porque acaben desapaeciéndo los saltapraos.

La Campaña del 20 P

Yá ta ehí yá l'iniciu de la Campaña Electoral pal 20 Payares. Ya bien escuru que pinta.

PPSOE presenta pa presidente a dous peisanos del norte: A Rubalfaba los sociatas, un santanderín que pasa los branos por Llanes (colo qu'ello-y trai) ya la dreichona puen a Rajoy, que yía un gallegón qu'inda nun se sabe tampouco quéi, ya que peime que viviera a lo menos dous anos pa Uvieo. Ési nun pasa tiempu por Asturias pa nada.

Pero bono, eso yía sacar la famosa "Pataca Connection"; bono, non nel casu de Rubalfaba. Por cierto, yía amigu d'outros dous asturianos, venceyaos a Llanes: Jaime Lissavetzky - apellíu vaqueiru- ya Antonio Trevín, que ¡cárape! Vei nas llistas del PSOE-FSA pal Congresu, de cabeza n'Asturias. ¡¡¡Qué se prepare la Costa Llanisca!!!

Los Foristas, que son la risión, van presentar candidatura por Madril, pa competir con Esperanza Aguirre ya cola UPyD. Son las cousas del Rexonalismu Asturianu, que bono, xuegan esa baza. Cada día entiende ún menos de rexonalismu ya d'esti país...



Vei tar la cousa guapa. Yá lo dicía you: "D'esta ganan los mious". A ver si yía verdá....

Grecia

Grecia foi un gran esprimentu económicu. Y tamién un bon pufu. Grecia amuesa que, les polítiques monetaristes, han dir de la mano de la economía real, non, como les doctrines neolliberales de Margaret Thatcher, en primer llugar, pero tamién de Reagan, y especialmente de Carlos Saúl (Menem), lleven a la llarga a la mierda.

Y claro, la solución paez clara: Daquién va pagar la entrada de Grecia nel Euro. Por supuesto que van ser los griegos. Son los que tienen les de perder, pero tamién Alemaña y Francia, que van pagar la delda griega a fondu perdíu, polo menos una parte.

¡Ai, l'euru... ! Tenía una mazana (non mecánica) podría. Foi Grecia, que se-y atragantó Mastrich, pero hebo que meter Mastrich a calzaor, sí o sí.

Y neses tamos agora.

Sarkozy diz que meter a Grecia nel euru foi un erru daquella.... Pa min l'erru foi Sarkozy en sí, pero bono, pue ser que sí, metieran a Grecia mal metida. Pero claro, Grecia, el país más xacobín d'Europa Occidental, de la "Europa Civilizada", había que lu salvar. Si non Grecia, ¿entós qué? Porque Grecia, cola so filosofía occidental d'aniciu llariegu, ye un pegoyu.

Pero asina dende fora, dende París o Berlín o Munich. ¿Pero yera Grecia como pensaben? Yo nun lo sé, nunca nun tevi aínda en Grecia. Eso sí, paez que preparada nun taba pal Euru.

Yá foi, dende la so independencia del Imperiu Otómanu una fixación. Solidaridá pa colos europeos griegos, frente al invasor musulmán asiáticu. Llueu, tres la Segunda Guerra Mundial (sofitu metanes a la Gran Grecia), pues home, nun podía cayer nel cuellu de la URSS. Ehí Churchill xugó les sos cartes con rixu, y Grecia voltió pa Occidente. ¿Colocanon asina un aliáu que zarrara'l Mar Negru estratéxicamente? Yo eso nun lo sé.

Eso sí, ehí la dinastía alemana -a la cuala pertenez la reinona españolista- foi echada pola fuercia.

Nun sé, dame la impresión que Grecia ta dalgo llonxe del restu d'Europa Occidental, y los Europeos Occidentales tenemos una idealización de Grecia, como heriede de la Magna Grecia, de la Grecia Clásica, de la Grecia de los preceptores de los romanos, de la Grecia de la Filosofía, la democrácia, la política, la ética, l'arte y el refinamientu antigu.

¿Pero de verdá estos griegos son heriedes directos d'esos griegos? ¿O siguienon sufriendo la decadencia dende aquella dómina hastasagora que llueu nun volvienon llevantar cabeza más? Pufff, menuda preguntina tamién per parte mía. Nun sé, yo nun conozo nada de la hestoria griega.

Eso sí, nun destaquen por tener grandes autores nel campu la economía, inclusive Aristóteles que tocó tolos palos, fuera de dalgunes definiciones (y la mesma palabra "economía" que non necesariamente foi d'Aristóteles) nun foi nada reseñable.

Pero tal paez que dende'l restu d'Europa hai una delda con Grecia que lleva un poco a tratar a esa nación cómo a una vieya posesión familiar, d'eses que yá foren d'un/a bisbuelu/a.

Nun sé, nun conozo tanto la realidá griega, y los griegos son como tola xente, habrálos más guapos y más feos, más llistos y menos llistos, más "bonos" y más "malos" (anque parieren o nun parieren) pero vaya, qué sé yo, ¿sabe daquién si se dan los ocalitos como prehiquí? Igual nin a los griegos-ys presten como al restu d'europeos.

Nun sé, dame que nun conocemos tanto a los griegos, y que hai creada una borbolla al rodiu de lo griego (presente y pasáu) y la cosa nun foi bien.

Yo pol francés nun me daba más, porque cada día toi más convencíu que Francia tienlo más fácil pa dir tomar por _ _ _ _ qu'España (sí, inclusive con Asturies). En Francia dirá daquién que sí que se dan los ocalitos, sí ho, pero tamién son xacobinos que da gustu, y últimamente asomanon al abismu del Avernu Económicu y eso ensin ser PIGS [ú teóricamente ta'l Reinu de la Pandereta Español] que desque sona peyorativu nun entra tampoco Italia, y yá llembro cuando falaben de PIIGS, pero agora la cosa púnxose seria: Igual nun taba tan mal España y nun sabíamos que sí Italia y Francia nun yeran lo que paecíen.

¡Coses qu'hai que ver!

La respondable de política llingüística de FAC

Bono, y polo menos que tienen una. Que nun veo yo a la FSA con una responsable (colo qu'ellos dicen que son) de política llingüística. Eso non, ai nun vaya ser.

Pues el Dóberman punxo una nel so partíu. A una rapaza, y fala asina.

Bono, pues mui bien ho. Asina yá vamos entendiéndonos, polo menos nesi tema. A ver, eso sí, cuánto dura entá. Qu'estes coses piden tiempu.

Carta espublizada nel Diario de León

¡Teo de xubir al Puertu... ! Cómo'l cantar, cantar de señardá, davezu, pa los que de neños díbamos (tamién davezu) camín de Llión a secar o cambiar d'aires.

Pues sí amiguinos, en Llión tamién hai quien s'alcuerda de nós, remembra les sos vivencies, y bono, yá sabéis, saca la llingua a pacer.

Ésta ye d'una d'aquelles persones.

Bono, yo yá lleí la carta. Si daquién de Llión ta lleendo esti insiertu, esta cuita mía, y conoz al homín (bono, él ye un "hombre", que nun ye lo mesmu, claro, polo menos pa él) que-y diga que perdió la collera, que la tien pa recoyer nel edificiu hestóricu de la Universidá d'Uvieo, xunto cola albarda, y too guapu yá.

Sicasí, esti berríu préstame especialmente, polo "cultureta": El bable de la «normallizació llingüístique, ho» también ye yeyé, dice Sócrates: el asturianu suena sincero y guapo en aldeas o mercados, pero en un asturianista de piso o en un llingüista babayu suena a recitado pedante sobre zapatos de mucha plataforma... ¡ye yeyé! .

Xente como Pedro Trapiello, opusianu pa más señes, son les que faen falta pal desendolcu cultural, económicu, políticu y social de Llión, sí señor [pero eso sí, que lu caltengan ehí ocupáu].



Ah, el mensax de Xesús ye xustu y misericordiosu, pero na boucona de Pedro Trapiello sona a fanatismu y a babayón pedante, que davezu entra nos folleros nos que naide-y llama, pero como ta en que tien qu'opinar, pero pol estremu como los tontos, pues en fin, prehí lu atoparéis.

Númaros

15.200 manifestantes (según la policía local de Mieres) salieron colos indignaos.

5.000 manifestantes nel Niemeyer (ensin más fontes que la noticia de l'axencia EFE).

Na cabecera d'una noticia trai "Alrededor de 5.000 personas muestran su apoyo al Niemeyer", y na otra "Miles de "Indignados" toman Mieres".

¿Terxiversación? Non.

Eso sí, el día que xunten tolos trabayadores y los dueños de LNE delantre de la plaza La Xesta n'Uvieo y llueven albardes... de xuru que nun cai una en suelu.

Pero bono, eso ye lo qu'hai.

Nel día de la Hispanidá

Pues otru añu más, nel día'l Pilar, esta fiesta. Controvertía, per otru llau, puesto que bono, taría mui guapu da-y un calter más "internacionlista", y menos señardosu d' "esi" imperiu.

Dende Castiella -parte grande d' "esi" imperiu- pero con música asturiana, esti videu de dellos pueblos baxo'l xugu de la Monarquía Borbónica.

Pero bien podíase falar de tolos países y naciones americanes, africanes inclusive o asiátiques y oceániques, con llazos comunes a la península, pero que davezu arrastren problemes de descolonización (podía ser un casu'l Sáḥara Occidental), de pobreza como los países centroamericanos o otros tantos.

Asina que nesti día d'hermandá, paz ente nós, y solidaridá ente los pueblos.

Agora'l Gochu Fartón vei pa Senador

¡Ai que pouco me prestan esos mensaxes electrónicos en cadena que quieren baltar el Senáu!

Pero yía lo que toca. Avanzase cara un sistema áu los políticos escoyíos por representación popular tengan menos fuercia nel panorama políticu que los grandes empresarios capitalistas, ya los sous grupos de presión infiltraos nos diversos puestos políticos, eso sí, de representación de los sous intereses. ¿De cuálos? De los de sou.

Esto yía cumo si pones ehí de Director de Mediu Rural al vicepresidente del Cártel Internacional de los plantadores d'Oucalitu. ¿Por quíen vei mirar? Polos intereses de los grandes madereiros especializaos nos oucalitos, ya van llevallo too por delantre. Yía una pena, pero yía asina cumo furrulan las cousas. Ehí taba aquella gran frase, que quedóu en tarrén llapidariu, que "la democracia yía'l gobiernu de las minorías".

Conque, sí ho, llegoume vía corréu electrónicu un mensax (ya por favor tamién sobre la muerte del cebollu aquel, qu'en paz estea, d' Steve Jobs, que fou un capitalista más, nada de Santín pro humanidá: un día podíamos falar un pouco de cúmo furrula'l sector de l'alta teconloxía electrónica ya informática,  p'asina ver que non, son xenios, pero non de la ciencia, sinon del negociete) colo de chapar, por enésima vegada'l Senáu, que nun val pa nada, ya son millones d'euros metíos ehí pa nada.

Probina xente, pienso. Pero cuando veo que son tantos, yá toi cumo si cayera nun campu berzas de dimensiones indurstriales, ya colas rodiellas rotas, ehí paráu ensin poder moveme.

El Senáu, cuesta, sí. Pero yía que la democracia nunca nun foi dalgo gratis. A lo llargo de la hestoria, las democracias más consolidadas, más avanzadas (realmente) fonon conseguídas con muncho esfuerzu. Nunca naide regalóu nada, vaya.

Conque pa min el problema nun son los cuartos que lleva'l senáu (lleva más las axudas públicas al sector financieiru, magar que siga calteniendo alzas nos beneficios). El problema real del senáu yía que tien poucas funciones. Ya nun me refiero aquella que-y dan de llugar d'asilu a los políticos más vieyos. El senáu con que valiera pa controlar prehí los desmanes que se faen... ya taba bien. Convenía un reforma d'esa cámara. ¿Senadores desinaos pol Rei? ¿¡Ónde s'ha visto!? Eso, por exemplu, nun se podía permitir.

Pa estas eleiciones xenerales vinientes, la FSA presenta a Areces al Senáu. Na, ya tou seguru qu'entrar entra. Pero you pal Senáu, yá lo dixe, vou cola de Piedrasblancas. Eso sí, toi colas palabras del Ex-Premier. Anque bien lo había que dicir todo, eso sí, falar d'enchufismu na FSA ya nel sou aparatu de gobiernu, de las maneas dictatoriales qu'asomaban, tan davezu, d'aquella chulería, d'esi grandonismu, d'esi antiasturianismu militante....

El dóberman, colas suas palabras a la prensa en Les Noticies, pal sou númaru especial del quince aniversariu yá amosóu un perfil más amable pa cola llingua. Anque tamién se véu, d'él nun s'espere una palabra nesa llingua, que por outru llau hai que protexer ya normalizar, ya aplaudir al Conseyeiru por usalla.

Poro, you tou con una reforma del Senáu, que se convierta nuna cámara útil pal Estáu, p'avanzar a un sistema federal, republicanu, más xustu no económicu ya no social-llaboral, ya más democráticu. Ya pa que puengan calces a los capitalistas que quieren mandallo todo ya nos políticos qu'acombayan pa con ellos.

Bloque por Asturies- Unidá Nacionalista Asturiana nun se presenten a les eleiciones estatales

Y nun vos pensar, ye una gran pena. Pero esti trabayu y esti aforro de recursos (cuartos) han, dende'l mio humilde puntu de vista, centrase en siguir calteniendo'l proxectu d'esi frente nacional d'esquierda.

Ye pena eso sí, que nun se presenten a les eleiciones, porque aquellos sedría bono pa la democracia y pa la sociedá. Pero si viviéramos nuna auténtica democracia: Güei, el sistema bipartidista caltien dos grandes partíos de tendencia neolliberal, ún de calter más Neocón (llámen-y PP) y otru d'aquello que llamen Tercera Vía (Les sos siegles son PSOE), pero n'esencia y énte too Neolliberales. Con referentes como Thatcher, Reagan o Bush per una banda, y pela otra Tony Blair o Bill Clinton.

Y esto bien porque nesi conceptu neolliberal hai que pensalo too como si fóramos xerentes d'una empresa que perteneciera a una sociedá anónima que cotizara en Bolsa y tevieramos de dar cuentes a los nuesos dueños-accionistes.

Pero los partíos nun tienen esi fin mercantilista [meyor dicho, eso nun ye la so función]. Los partíos son unu de los calces pa desenrollar la democracia, la participación ciudadana, pero aínda más que los partíos, son los propios ciudadanos, los que son el calcer principal nun sistema democráticu. Y por supuesto, el bipartidismo, los oligopolios, las plutonomíes y demás, son enemigos de la idega de democracia participativa universal.

Énte esto, la unión BpA-UNA ye una bona erbía pa construyir un (poco) meyor futuru políticu (y social) n'Asturies, y nel mundu. Porque sospriende l'afirmación del presidente-dóberman del Principáu, col so lema "Más Asturias, Mejor España", que nun escuende, sinon, un fuerte nacionalismu españolista, nin les sos midíes económiques que, hasta agora, son heriedes del más "clásicu" Neolliberalismu: Amenorgar el sector públicu, afogalu, echar trabayadores a la cai, recortar gastos, recortar tases impositives, facer un sistema impositivu regresivu y favorecer les rentes más altes y el capital. Ah, y da-y al sistema públicu una imaxe d'empresa privada; pero pa qué vamos engañanos, una empresa privada ye una cosa y un gobiernu, otra mui distinta.

Poro, yo nun toi d'acuerdu con esta visión política. Non, porque col tiempu apaecen ineficiences, porque nun se pue dexar sólu al Mercáu. El Mercáu, que tanto prediquen, tien nomes y apellíos. Prehí suena Emilio Botín, col so grupu Santander. Tamién el BBVA, que nun se-y da mal. Iberia, con Telefónica y Repsol pel so llau. Monopolios regalaos al gran capital neolliberal que pasaron a empeorar les condiciones llaborales y los servicios qu'ufríen: ¿Ú la eficiencia neolliberal? Pero nun se tenga pena, que los medios (Grupu Prisa, venceyáu al PSOE, o El Mundo y Intereconomia, pero tamién Antena 3, Mediaset, la Cope y los que quieran, participaos pol poder y pol capital van soltar rispiu d'ello. Eso sí, pa cuando eses empreses tienen problemes ehí llega a salvar con axudes económiques "Papá Estáu".

Pero toos conocemos y gastamos d'estes empreses. Conque ¿Cuánto más cuenten engañanos?

Poro, equí precisense soluciones contra'l Neolliberalismu. Hebo crisis, ¿pero quién la sufrió más, los empresarios capitalistes o los trabayadores del común, el paisanu?

Precisamos partíos locales, nacionales, y que dean soluciones a toos estos problemas. Cuido pa min que'l BpA-UNA ye un partíu que tien que siguir trabayando nesti camín.

¡Puxa la coruxa!

Rareces asturianes (música)

La música popular tradicional asturiana nun ye sólo la tonada, la gaita, el baille, la curdión, el vigulín, les xiblates, nin la llírica, nin la zanfoña, nin clarinetes, nin turulles, etc. ¿Qué pensáis ho?

Voi amosar dos instrumentos asturianos tradicionales, en dos rexones pequeñes. El primeru yá pue dicise que nun ye tan desconocíu. Trátase de la bandurria.

Esti instrumentu ta perespardíu pela península ibérica, pero n'Asturies sólo lu atopemos pel valle de Caliao, si bien tiense testemuñu d'elli pela fastera oriental del país. Ye mui tradicional per tierres llioneses, castellanes y cántabres si bien ehí conózenlu pol nome de "rabel".

Equí foi perpopularizáu por Xuacu Amieva, nel discu Santiago de The Chieftains grabó un tema, El Besu. El discu grabó un grammy, y la bandurria pasó a ser un instrumentu más del nuesu panorama.

Bono, velehí la xipla ou xipra. Agora tamos n'Astierna, en Trabáu, n'El Reboḷḷal, pa la parte Ḷḷarón en Cangas...

La xipla ya'l tamboril yía un instrumentu tamién mui espardíu, pero n'Asturias tamién se tocaba sólo nuna esquina. Y digo eso porque per delles escueles de música tradicional y hasta conservatorios del centru d'Asturies s'enseña yá.

Per otres tierres tien otros nomes: Txistu n'Euskadi, silbo en Cantabria, chiflo p'Aragón, gaita pa Salamanca, Chifla ou pitu pa Llión... Tabor pipes n'Inglaterra...

El tamborileiru, que ye'l músicu que toca la xipla ya'l tamboril garra cola manzorga la xipra, que tien trés furacos, y cola mandrecha percute'l tambor.

Bono, ta bien pa entretenese esti instrumentu, y esti conxuntu, pero pa min ú tea la parexa de gaita y tambor... Paez ser que, na zona Cangas, Degaña y Ibias, fai cosa de décades, competíén nes fiestes -énte les comisiones, entiéndese- los tamborileiros coles pareyes de gaita y tambor. El tamborileiru yera más económicu, y sí, presta, presta.

¡Yá teo yo ganes de faceme con una xipra!

Énte la estrangulación de RTPA

Bono.

Cascos vien pa salvar les Asturies. Y los probitinos asturianos que nun se decaten, y dicen: "Nun vemos qu'esti paisanu vaya salvar nada, a lo menos a ojo de buen cubero".

Pues nada, otra vuelta más véome na tesitura d'apurrir soluciones pa salvar Les Asturies [Que por otru llau, pa min acaben ú escomienza Unquera]:

A) Llantar cinco millones d'ocalitos en tarrén soberanu d'Asturies. Midida mui importante. Y diréis: "Meca ho, son munchos ocalitos". Pero non, amirái, ente la Universidá d'Uviéu, el Cepesma, el Seprona  y el Serida, n'acción en conxunto, habíen desendolcar una mutación pal ocalitu pa que se poudiera llantar a partir de, qué sei you, de los 1500 metros. ¡La d'ocalitos que se diben poder llantar n'Asturies!

B) Val, bien. Trancamos la RTPA, pero n'Asturies nun podemos quedar ensin TV, porque al Dóberman présta-y salir nella. Entós lo qu'había que facer yera da-y una concesión a Intereconomía, pa que tresmitiera p'Asturies, pero nun canal temáticu: "Intereconomía Asturies". Con un late night pa Ovidio Sánchez, por exemplu, Informativos presentaos por Juan Vega, debates por Juan Neira, La Tarde con Cuca Alonso (como ven too mui chungo)...

C) Nun poner la tele tanto, y asina lleer más; n'especial los clásicos n'asturianu.

D) Nun lleer tampoco n'asturianu, que nun ye oficial [Siéntolo muncho amiguinos, pero pa esta nun va ser] , pero lleer tolos díes LNE, asina vamos pasalo toos muncho bien.

E) Si queréis ver la tele, vei telecinco, que presta muncho.


Bono, yo yá di unes idees.

Agora que, mal entama'l Dóberman a lluchar contra'l desemplegu si zarra'l grupu de radio televisión públicu.

Y cuidadín, qu'ehí tevo la FSA col contratu con Mediapro pa la Fórmula 1 (si bien el diariu Público ficiérase cargu de LVA), y asina tolos asturianos víamos la Fórmula 1 en La Sexta y na TPA. Gran negociu aquel.

TPA ye verdá que nun foi la gran canal n'asturianu, que los asturianistes quixenon. Pero ye verdá que tevo programes memorables, como Camín de Cantares, Terapìa de Grupo (cola Versión Asturiana), o los documentales MirAsturies, o les gales  de Sones.

Pero bono. Esto ye too. Una pena zarrar la RTPA, va ser l'acabación pal sector audiovisual n'Asturies. Y pa la televisión n'asturianu. Y pa dellos puestos de trabayu, munchos d'ellos bien precarios. ¿Ye esto lo que mira Cascos por Asturies?

María Esther García López, candidata al Senáu por IX

Esto ye una noticia política.

Resulta ser que, la coalición Izquierda Xunida d'Asturies va presentar como candidata al Senáu español a María Esther García López.

Bono. Conozo a María Esther personalmente, y con eso ta -pa min- too dicho.

Esther ye conceyala en Castrillón, conceyu antitaurín. Escritora y poeta, pernomada na llitaratura infantil n'asturianu. Columnista -y mandándose del asturianu, por cierto- en LA NUEVA ESPAÑA. Foi profesora d'asturianu, y ye miembra de l'Academia de la Llingua Asturiana.

Cuido, arriendes de tolo anterior, que ye una persona honesta. Poro, va ser una pena qu'Esther vaya pasar los prósimos cuatro años en Madril, porque va salir escoyida, y va tar ehí de senadora, y va ser bono, porque de xuru que lo vaya facer mui bien.

Y de xuru que con ella, Asturies va ganar.

Hai qu'abrir nuevos horizontes nel Campu Asturianu

..Y bien que lo saben nesta casa.

Ehí taba implicáu hasta'l gatu.

Nada, yía que la cousa ta mal, el campu nun da nada, ya cola seca d'esti ochobre más inda, ya hai que diversificar, ya qué son 164 plantas de marihuana...

You diría:

A) Son pa consumu domésticu, pal catarru, pa cuando tuso. Asina, con unos vafos que séi you cumo se faen marcha la murnia toda.

B) ¿¡Hostia, pero nun yía meiz dél del nuevu, d'esi tán modernu qu'hai agora!? ¡Ai mamina, agora entiendo porque los gochos se ponían tan malos! ¡Qué enquivocáu taba! ¡Vivía na mentira!

C) Eso nun yía míu. ¿L'horru? Non, éso sí, pero esas plantas you nun las punxe ehí. Igual venían col horru, pero you nin las punxe nin me decatéi que taban ehí.

D) ¡Ai, yá me paecía qu'aquello nun yeran tomates!


Bono, escusas hai munchas. Podíamos siguir ad libitum, pero non, pa outra vegada. Eso sí, teo que dicir qu'esti añu los llumiagos ya los caracoles (ya tamién las putas ratas-que-podían-dir-tomar-por-culu acaban colas berzas. Plantar marihuana pue ser una bona alternativa, anque la policia piense no contrario.

Pero qué séi you... La vida en Balmonte pue ser mui dura. Mui dura ya muncho aburrida. Ya con esa marihuana dicen que pasase bien. ¡Qué séi you que piensa la xente prehí!

Agora que menudos invernadeiros más bien pensaos. ¡Ai mialma si se dedicaran a las llechugas cola calor que fai ya col mal branu que vino diban sacar más cuartos! Por ferramienta ya infraesctrucura que nun sía... Lo que pasa yía que las mentes criminales del Mundu Ruraliegu sólo piensan en tracamundiar la toponimia (al castellán, entiéndese), en llantar oucalitos ya en cousas d'estas.

El tritu, éso sí que nun lo semaban, porque eso vien de Colombia, polo menos. Menudas fiestas tien organizao esta familia. Eillí Nueche Vieya tien que ser criminal...

Pues toi pensando que, en collaboración col Ayuntamientu Balmonte, los vecinos podían poner una comperativa ya asina trabayar n'andecha. Qué séi you mentres nun los garren... tritu p'alantre ya maría tamién. Ya quién los vería ehí los vecinos toos enfotaos... Ya apaecerían las economías d'escala, ya los bucos a metá de preciu, diban facese d'ouru.


Pero bono, nun-ys vou dar ideas. Sólo dicir que bono, un putu ríu salva que Balmonte nun sía integráu nel Conceyu Salas. ¡Las fiestas que se diban montar!

Los Santos La Ponte, ensin Lluz

¿¡QUIÉN-Y PUEN LA LLUZ A LOS SANTOS!?

Ésa yía la entruga, incómoda, cumo un escozor, que más se siente pel conceyu de Castripol, conceyu nel que por outru llau xorrecen los oucalitos cumo tamién lo faen los pufistas.

Pero pa pufistas los vecinos del conceyu de Ribadeo, yá nel Más-Allá. Esos sí que son unos pufistas profesionales, pero tranquilos, qu'eillí tamién xorrecen los oucalitos qu'aquello mete miéu.

Resulta ser que pa cruzar cara'l Más-Allá hai una Ponte. Antiguamente una vieya lleenda dicía qu'había un barqueiru, que llevaba a la xente. Llueo ficienon la película, pero yá ensin barqueru, ya'l que tresportaba la xente yera una persona de color (¿Pue dicise nesta seición de color por cuenta negru), ya la crítica más purista armóula gorda. Pero bono, los moderninos son asina, que se-ys vei facer. Ya nel cine nun se-ys escapa tampouco, qué más da.

Conque llueo punxenon una Ponte, ya cumo nun se debienon poner d'acuerdu, baxanon tolos santos ya, poro, quedóu-y el nome: La Ponte los Santos.

Sí, sí, nun vos riaís, ehí taba Fraga, que yera'l que más santos baxóu.

¿Ya a quién-y colganon el "San Benitu"? A los conceyos ilustrísimos ya escelentísimos de Ribadeo (pol Más-Allá) ya Castropol (pola Nación). El San Benitu yía la lluz, qu'hai que pagalla, porque la Rede Nacional nun permite poner ehí eolicos. Bono, nin la Rede nin el CEPESMA.

Ya hala, la primada pagábanla relixosamente (ai non eso sí, too mui relixosu) hasta qu'al alcalde ilustrísimu ou escelentísimu del conceyu del Más-Allá ocurréuse-y gastar los cuartos de la lluz nuna empanada en Mondoñedo pa lo del Llibru Guiness. Pero foi cola familia, ya picanon dalgo, ya al pouco, colos xueces nun gananon por trés raciones y media.

Bono, ya aquello quedóu igual. Ya Castripol pagaba, porque... ¡Qué séi you! Igual fonon los que perdenon l'apuesta la empanada, ya quedóu la cousa asina. Sedría raru, pero you yá nun me creo nada....

Entós hasta agora que se plantóu l'alcalde d'ehí: "¡Nun pago, nun pago ya nun pago! ¡Coyones yá! ¡Traéi p'acó los cuartos yá, joder!"

Ya los Santos ensin lluz.

Bien mirao tampouco yía problema, porque teo visto por Salas unas velas bien guapas, ya bien baratas.

Non, pero'l casu yía más graciosu. Fou qu'agora dase cuenta l'alcalde Castripol que tán empufaos con una delda de 4'2 millones d'Euros. Ná, calderiya, cumo you dicía...

¿Cuatro millones d'euros? Bono, col "coma dos". Eso nun yía nada hom. Vas deixar los Santos ensin lluz por cuatro duros. Bah.

Falan de la mala situación de las arcas municipales. Pues igual las había que cambiar de sitiu...

Son too tonterías. You lo que facía yera, si pago las lluces de la Ponte cobrar portalgu por salir ou entrar del/al Más-Allá. Hala, ya llueu ensin problemas. Mañana (ou meyor el llunes) llamo al alcalde de Castripol ya dígo-ylo. Queda dicho.

N'Aragonés

L'aragonés ye una llingua románica, propia d'Aragón (xunto cola catalana y, sí, según esti mapa tamién la castellana), y anguaño arrequexada al Pirinéu, na provincia de Huesca.

Col devenir de los sieglos, esta llingua quedó, como yá dixera, arrequexada. Pero entavía suena, pente los paisanos, esta llingua:

¿A que-yos sona? Bono, hai milenta videos d'estos gracias al YouTube. Yo recomiendo encarecidamente los videos sobre la raposa, ellos dicen-y "rabosa":

¡Cómo prestan la verdá! Train a la memoria les nueses histories, cuntaes polos vieyos tamién, asina como ellos. Yo tevi la suerte de medrar con estos cuentos (ou casos ou socedíos) que me cuntaben los mios güelos...

Sicasí, y yá pa más atopase como si tovieramos per Asturies, equí tamién tienen les sos mierdes. Nesta interesante iniciativa sobre la tresmisión de la llingua ente padres y fiyos, equí vese al final al "Amigu de los bables de turnu":

Bono, cómo per Casa. Interesante esta llingua, sí señor.

El Procurador Xeneral

La última ocurrencia del PP ye la supresión del Procurador Xeneral, pero bono; éso como si-yos da por vestir a Ovidio Sánchez de toreru.

La idea foi d'Isabel Pérez-Espinosa, que bono, eso. Depués de Samateo hai resaquina. Que vieno muncha calor per Setiembre y los cacharrinos peles fiestes capitalines tán mui fresquinos.

¿Ven vustedes? El mio último comentariu del párrafu dos d'esti insiertu informativu d'opinión xeneral ye como la ocurrencia de los del PP, un poco escribir por escribir. Asina, hala, a lo xole.

Ye que los vezos del PP... Daquello que siempre dicen que la cabra tira pal monte. Ye la mio naturaleza, que dicía l'escorpión.

El Procurador, o nesti casu la Procuradora, Xeneral sirve pa defender los drechos de los asturianos, énte les barbaridaes que davezu cometen prehí dalgunos. Y bono, sí ho, cuesta perres. Como tanto otru. Pero somos una democracia, ¿entós, ho? ¡Qué esperábais? Hai coses equí que, pa grantizar unos drechos, hai que les pagar. Asina ye esto.

Pero bono, que tamos falando del PP, 'perái. Equí sobren tantes coses... Ehí ta la Sanidá y la Educación, ¡menudu gastu! Esperanza Aguirre, si alzara la tiesta y mirara p'Asturies.... Del sustu tornaba otra vegada pa Madril a facer... bono, a xugar colos sos trebeyos.



Per otra banda, el Dóberman presentó'l so partíu, Foro, que yá nun ye d'Asturies, pelos Madriles. Éso, éso, éso ye lo qu'a él-y presta.

 

 

 

Nesto cómo Isabel la del PP, la cabra siempre tira pal monte. ¡A ver si queda ehí d'una vez por toes!

El Niemeyer y el Nuevu Conseyeru de Cultura

¡Qué prestosu'l debate que fixo Emilio Marcos Vallaure colos representantes de la FSA y del PP!

A él entruganon-y pol Niemeyer, fose peles rames, volvienon-y a preguntar, siguió andando per elles, y cuando-y tornanon preguntar, entós yá respondió. Y respondió lo que pensaba, claro. Y nun-ys gustó.

Y esto otra vuelta demuestra que'l gobiernu anterior d'Areces, en materia de Cultura, nun tenía definíu una política concreta. Bono sí, aquelles macroobres faraóniques, en plan un poco la Llaboral Ciudá de Cultura, el Niemeyer, el Calatrava, que sí, facíanse (y a comuña col PP tamién) pero nun se sabía mui bien pa qué.

Y agora anden los cimientos de la sociedá kitch-provinciana too alarmaos. Sólo falta qu'alcen la cabeza dalgún calabre y dalguna cadarme y tiren pa contra la política llingüística que ta a sacar p'alantre'l conseyeru Marcos Vallaure. Yo, agora mesmo, pagaba por ver a la Pepa y a Gustavo Bueno echando contra la llingua otro poco.



Pero ¡ai qué coño!, si hasta punxénonse d'acuerdo La Voz de Asturias con La Nueva España.

De LNE nun se podía esperar otra cosa. A esos muncho-ys cambió, la verdá, porque taben acostumbraos a facer y desfacer, manipular y acombayar, asegún, y agora, claro, nun pueden. Y amás toos sabemos que tán a sueldu del PP Gabinón. Pero LVA... Y más agora que pertenecen al grupu del diariu Público....



Pues yo, por una vegada, toi col Conseyeru. Hai qu'iguar aquellos monumentos prerrománicos y non prerrománicos, y pol padremuñu popular y tradicional. Y tamién pola llingua y la cultura llariega. Que ¿pa qué sinon ta la Conseyería de Cultura? Les macroobres provincianes-kitch que les faiguen los cántabros y Herrera, en Castiella y Lleón.

Los papeles asturianos de Salamanca y los Toros

Anda la xente taurino too esprecetao per Cataluña y per mundu alantre porque prohibieron les Corridas de Toros. ¡Milagru! A ver cuando les prohiben tamién n'Asturies hom. Polo menos que baltien abaxu les places asturianes que nun pinten nin con brocha gorda nin con pincelón. Les de Barcelona teníen un estilu acordies cola ciudá, les d'Asturies paez que cayeron del cielu.

Que se preocupen de la reprodución de los gaḷḷos monteses y de controlar los corzos que joden tolos mazaneiros y se dexen de toros; eso amuesa la cultura antipopular d'esta práctica, polo menos n'Asturies.



Per otru llau, Andecha Astur y organizaciones afines pide que tornen p'Asturies los papeles nacionales de la Guerra Civil.

Yo a min eso, en principio, nin fu nin fa, pero bono, como taba ehí Cubero, que ye amigu míu, pues bono, bah. Polo menos tenémoslu entreteníu en daqué.

Mirái, yo lo que facía yera traer los papeles dende la ciudá del País Llionés p'Asturies, pa Xixón, y ponía a Cubero a lleelo y repasalo too, y entós como dicíen los vieyos antes, "nun hai guaḥe".

Por cierto, Cubero, si tas lleendo estes llinies, que sepas que me debes dalgo:  Unos mapines que teníamos falaos...

Toponimia de Llinares ya Santuyanu

Prometió FAC nel programa de la so candidatura pal Conceyu de Salas que, si salíen escoyíos, diben promover les parroquies rurales, d'acuerdo col Estatutu d'Autonomía vixente nel Principáu.

Pa min, nestos momentos de recortes, paezme que la constitución de parroquies rurales diba ser beneficioso, l'autoxestión del Mundu Ruraliegu, y diba afitar población nel campu. Más que atropar y axuntar conceyos lo qu'había que facer yera promover esta figura xurídica alministrativa asturiana, polo menos n'Asturies.

Bon, el casu ye que, de sacar alantre esto a min prestábame que la mio parroquia (Llinares) xuntara cola vecina de Santuyanu; anque va ser difícil, puesto que mentres que Llinares xira en torno a la exa Llinares-Maeza, Santuyanu quieren facelo cayer pa contra Corniana. Pero bono. Realmente somos el mesmu valle y la mesma xente, ente nós somos toos parientes.

La parroquia de Llinares nun tien un pueblu que se llame Llinares, sinon que ye'l nome de la parroquia. Ésta ye de rancio, y yá hai menciones toponímiques de vieyo, como "Paules" una villa donada a la Ilesia d'Uvieo y que podiera ser los praos que llamen anguaño "Poles"; y otru topónimu vieyu sedría Sancto Andrea de Campo; San Andrés (o Sanandrés) y el Campu Sanandrés, ú aínda hasta fai bien poco se facía un mercáu d'ablanes y llinu.

Y esta ye otra. La toponimia popular, como la Jota Cangas, delles vegaes tien más d'un nome.

Son nomes d'aldees, llugares y caseríos de Llinares: La Estrada, San Andrés (colos barrios d'El Coutu y El Diestru), Las Campas, Villar, Bouríu (o El Bouríu), Corquéu, La Casona, El Mouru, La Piniella (o La Piñella) (colos barrios de La Pontiga y La Cuesta), La Veiga, La Trapa, La Calea, L'Escobiu, La Cruz, Monesteriu, Villarín (o Villeirín) y Folgueiru. El Caleyu (con Camuñu) y La Puerta (con Maicina y seique Maeza) son pueblos que, nel casu d'El Caleyu perteneció a Llinares, diendo les cases a enterrase a Llinares y la xente del Caseirón (güei hotel) a Camuñu, y La Puerta en teoría ta xebrada pela carretera ente Maeza, Maicina y Llinares, pero son de facto de Maicina.

Pela cueta, Santuyanu ye una parroquia más pequeña, y con menos núcleos, pero eso sí, más concentraos tamién. Son parte de Santuyanu: Santuyanu (antigu Santuyanu Las Silvas), col barriu La Barzaniella, El Monte, Mourusu, La Peral, El Pozu, y Talavera/Prada, que parte ye de Santuyanu y parte pertenez a Ponteveiga, yá en Pravia.


Xunta a les dos parroquies el Ríu Barreiros (o Barreiru) y la romería n'honor a San Lluís, na hermita de la Virxe del Llanu, nel Monxagre. Y posiblemente antiguamente'l poder de los flaires de Monesteriu de Llinares; porque dicir que Llinares tien dos Ilesies, una consgrada a San Andrés, mui antigua, y otra, nel monesteriu, l'actual, a Samiguel Arcánxel. Péme que la Ilesia de Santuyanu ta dedicada a San Xulián.

Cuenta, asinamesmu Llinares, con un importante Castru de pa cuando los mouros, que, por tar nel monte Las Cogollas lleva esi nome: Castru Las Cogollas.

¡Nun baxanun de La Estrada 

hasta Las Cruces un carru!

(...)

Nun falta en Llinares quien

sepa pintala'n La Habana

y pintala aquí tamién

pul tiempu de segar paya.

Emilio Pendás Trelles n'El Despertar de Linares y La inversión de mis ocios

Toponimia: ¿Uviéu, Sieru, Llangréu?

Pues vou sacar andar al filologuín, que yá se sabe toos llevamos dientro, ya qu'amái, el míu yía caleyeiru. Pero pouco; tampouco tanto, nun vos pensar.... Nun yía que sía Phileas Fogg, vaya.

Buó, el tema que güei abarca yía sobre dellos topónimos: Uvieo, Siero, Llangreo ya Grau. Esos cuatro.

La toponimia yía, hai que lo dicir, más complicada de lo que paez, ya los asturianistas pa las cousas complicadas somos... ¿cúmo lo dicir? Por dicir dalgo "yéramos poucos ya paríu la buela". Sí yía bona espresión. Taba pensando en que yeramos mal menor, pero non, somos parte, ya de la bona.

You aporfío a usar el topónimu, pesie al miou orixe salense, moscón ya valdesán, Uvieo. Sí, séilo, you -si creemos na toponimia popular del falar propiu del que fala- tenía que dicir Uviedu ou Uviéu. Ya dígolo, mialma, pero procuro escribir Uvieo, porque casa meyor col falar uvieín. Ya digo qu'aporfío porque yá me lu tienen correxío unas cuantas de veces. Pero you sou neciu. Ríndome difícil.

Eso sí, nun me paez tan mal, porque nesti casu Uviéu/Uviedu esiesti ya yía'l topónimu d'alcuerdo col falar del occidente del país. Pero Uvieo, meyor. Nun me corrixáis más con esto, porfa.

Caso paecíu con Grau. You digo Grau. Miou pái, que yía de Grau diz Grau. Ya tola mia familia, vecinos ya conocíos de Grau. Hasta l'outru día, el topónimu oficial fuera Grado, pero eso sí que nun se dicía.

Sí yía verdá que, nós, pronunciamos una "-u" que bono, sona casi cumo una "o", pero qué se-y vei facer. Nosoutros somos asina. Sin embargo, pue ser que, ya teolo sentío a xente de Les Regueres, d'Uvieo ou de Llanera dicir "Grao", pero xente que nun pronuncia la "-u" cumo nós. Ya sí, pue ser que sía un casu similar al d'Uviéu pa nós.

Lo que sí paezme que touvo bien esplicáu daquella fora la de Llangreo/Llangréu. Quedar, quedóu Llangréu. Pero ser yía Llangreo. Pa eso hai prehí un informe mui guapu que lo esplica meyor que you lo vaya esplicar.

Ya yía yá de traca de feria de San Pedru Maicina lo de "Sieru". Eso sí, pa Cangas de Narcea sí existe un Sieiru. El del centru d'Asturias yía Siero.

Yía un tema interesante, hai bien de nomes nel centru d'Asturias qu'acaban n' "-o" ou n' "-u"; anque tamién n' "-a", n' "-i" ou n' "-e". Por exemplu La Corredoria, Villaperi ou Guyame. La toponimia del centru d'Asturias yía bien complicada, cumo aquella forma que tienen de falar, ya siguen aneciando: "les vaques, les cases, les coses", pero bono, que se-ys vei facer... Hai que querellos asina igual.

Pero sí yía curiosu, porque pueden dicir Llangreo, pero al mesmu tiempu Ciañu. Refiérome a dicilo non nel miesmu güelpe voz, que sedría entós una cocada, la verdá. Pero sí, Llangreo ya Ciañu.




Agora que toi pensando... Tamién hai topónimos del centru d'Asturias qu'acaban en "-n", cumo Xixón ou Gozón... ¡Mamina en qué pataqueiru me metí!

Llei anti-albuertu: La drechona muestra les sos cartes

¡Por fin!

Les candidatures de los dos separaos (pero seique amontonaos, o axuntaos) prepárense pa roblar un pautu anti-albuertu.

Sí, l'anterior Gobienu FSA-IX abrió la mano a una llei qu'apoyaba a les madres xestantes desamparaes, pues agora llega la drecha axeitando una llei ordinaria pa baltiar esta llei con claro envis social.

¡Y a min que me rexistren, que yo nunca alborté!

Pero non, nun ta bien. Primero porque naide nun tien que dicir sobre si daquién decide tener un fíu o nun lu tener. O una fía. Y bono, con aquella yá ta bien.

¡Ai que vien Rato! ¡Ai que me da dalgo!

Yéramos poucos ya paríu la buela.

Primeiru foi'l Dóberman, na matria Asturiana. Llou, na xoya de la Corona, Cospedal (anque bono, pal casu na nuesa colonia de Castiella-La Mancha Barrera tampouco yía que fora mui aquello). Ya agora llega Rato.

Un ratu nun yía outra cousa qu'un mure. Ya'l Dóberman agora yía rexonalista, pues qué nun sedrá Rato, el nietu del "Facedor de Diccionarios", Apolinar Rato, un asturianista del preste de munchos, inventor de bien de "palabros" ya hiperasturianismos... Yá se sabe, buelu bablista, nietu neolliberalón.

Agora lo que faltaba, van salir asturianistas a mansalva dándose parabienes pola escoyeta del PP. Fichax estrella dizque. ¡Ai mamina!

Pero veimos ver ho. El problema fou qu'hai una crisis económica por mor de que nun se puede deixar la política, la ética nin los aforros al Mercáu, porque yá se sabe llou lo que pasa. Ya la solución yía... Más Mercáu. Porque Rato, yía muncho Rato.

La verdá yía que nun sou caletrar cúmo yía que lu van poner ehí; bono, unviallu a Madril, óu ta, na Corte los gochos, anque bono, bien miráu bien ta la cousa, porque asina nun se move, ya pa encima eso yía lo d'él: Tar ehí, en Madril, representando un Principáu d'unas tierras del Norte... ¡Mau carina!

Pero pero pero lo meyor de too, yía que nel Principáu, ellí nun país que séi you del Norte, ¡van votallu!

Dicía la bolitina Golda Meir, cuando fora de visita oficial a la URSS en nome d'Israel, nel primer viax oficial d'un diplómaticu israelín a Moscú, de la que los xudíos rusos l'aclamaran, que bono, daquella "igual-ys valía aclamar el palu d'una escoba, si venía d'Israel.

N'Asturias yía lo miesmo. Sólo qu'ensin sencia dala.

¡Ehí volve Pepe El Ferreiro pal sou Museu!

Sí, El Ferreiro torna pa Grandas como tou un heroe. Hasta'l conseyeru aceptó alzalu y llevalu a socostrines pel mediu la villa hasta'l museu. Y, en Grandas asina lu recibieron:

¡Qué xaréu! ¡Cuánta allegría! ¡Qué ricu taba too! (El tema'l cantar yía bono, sí paezse al "Americanos" de Bienllegáu Mr. Marshall, pero non, nun ye'l mesmu).

El Rexonalismu Asturianu

Dizque agora que, demientres doce años de Socialismu (dacuando de la manina d'Izquierda Xunida) cambió la ideoloxía del partíu que ta nel Gobiernu d'Asturies. Agora dizque gobierna'l Rexonalismu, y non d'esquierda, si lo que yera la FSA yera un partíu d'esquierda.

Cascos apuesta pol Rexonalismu Asturianu, frente al Xacobinismu antinacionalista (asturianu ya seique español) de la FSA. Lo cual tevo la so chancia, porque pautaban con IX, que home, polo menos pidían el votu nacionalista (asturianu). Anque cola FSA nunca se sabe: p'Asturies val-ys el modelu francés de departamentos y desafíen a la XE y al Estáu Español pola aplicación de la Carta Europea de les Llingües Minorizaes, nuna posición que los asitia n'aquello de "son más papistes que'l Papa"; pero pa Catalunya non, ehí sí apuesten pol catalán.

Conque foi'l profesor Buznego'l que escribió esti artículu pa LNE, el periódicu que ta engafentáu col nuesu Presidente.

A min sorpriéndime'l discursu del profesor Buznego, n'otres ocasiones tan empíricu, como d'esta se dexó llevar por, bono, digamos "la pasión". Velada, claro, que pa eso ye profesor.

Y la verdá que nun sé si tien muncha vecería la asignatura qu'imparte'l profesor Buznego, nin ú -en que carreres o graos- la imparte. En segundu, yo escoyera la optativa "Ciencias Políticas", creo que se llamaba (soi un desastre que yá nin m'alcuerdo nin cómo se llamaba, y nun me prúi tanto como pa dir polos apuntes al trasteiru).

Sí, non obstante, traigo a la memoria que na ciencia política -naquella asignatura d'ocho o seyes creítos- siempre se dexaba pa prau la propia ideoloxía pa estudiar les diferentes ideoloxíes, digamos d'una mena canónica (¿"callóndriga" val?). Y la cosa yera bien difícil... ¡Había cada guerra per clase... !

Pues voi permitime quitar la povisa d'aquellos apuntes de fotocopiadora y da-ys un repasu pa falar de....

EL REXONALISMU ASTURIANU

La FSA entra nuna contradicción: Vota a favor de la inmersión llingüística en catalán

Cataluña acabó ganando la batalla política pola inmersión llingüística en catalán. Gracies al sofitu de tolos partíos políticos, sacante del PP.

Eso ye una gran noticia. Los neños, na educación, tienen el drechu reconocíu pola carta de los Drechos del Humanos de la UNESCO, pero sicasí, casi siempre baltan esti drechu. N'Asturies mesmu, esti drechu ta conculcáu, nun siendo pola aplicación de la Llei d'Usu, que garantiza la enseñanza del asturianu y gallego-asturianu como asignatures.

Bono. Sicasí, en Cataluña sí el catalán yía llingua vehícular na educación.

Y lo graciosu foi que foron miembros de la FSA nel Congresu los que votaron a favor de la inmersión llingüística en catalán. Y nun rescampla, seique, qu'Hugo Morán votara a favor, pero sí Álvaro Cuesta. L'uvieín ehí tevo, apoyando lo que nun va apoyar p'Asturies.

A los pás y les mas entrugaron-yos. Y ésto-yos contestaron: "Preocupanos más que-yos dean la beca pal comedor. Los nuesos fíos van salir falando catalán y castellán".

Y ye verdá. Garres un guaḥe y pones-y clas na so llingua materna -nuna comunidá con llingua materna diferente del castellán- y vas tener un rapaz billingüe.

Son munchos, munchos, los ataques qu'al llargo l'añu reciben/imos los falantes y defensores de les llingües minorizaes asturianes, españoles y europées, como se pue comprobar. Hai, tamién, pasos, y va construyéndose la casa; dacuando pel teyáu, pero bono, tamién nel so orde.





Per otru llau, recibió esti añu'l Galardón de Pueblu Exemplar d'Asturies el conceyu de Santiso d'Abres. "O concello", que dicen prehí.

Llembro, cuando toviera pal departamentu de Côtes d'Armor, na Bretaña, los concursos qu'había ente los pueblos pa tenelos lo más guapo posible. Y ehí ta'l resultáu: ún decatase que ta nun país diferente: son todos xenialmente fermosos.

Creo que la so hestoria vien de, cuando na Segunda Guerra Mundial, esa parte de Bretaña quedara machacada pola guerra, y pol feísmu de les construcciones defensives nazis. Poro, los bretones dedicáronse a facer de los sos pueblos y villes llugares floríos, allegres y perprestosos.

Bono sedría pal premiu ési de Pueblu Exemplar importar la filosofía de los Côtes d'Armor, pero p'ameyorar los pueblos, non pa gastar tritu, lladriyu y cementu.

Pero la cosa foi qu'esti añu'l sacó'l premiu Santiso d'Abres, conceyu asturianu enclaváu en Galicia, de fala más nidiamente galega y buó, foramano total; pero que supo conxugar la so cultura popular tradicional con un fondu sentir asturianu: la so esencia Santiseña.



Eu boto un ixuxú d'alegría por Santiso.

Trámitase a reprocidá das televisióis autonómicas

Martes trece, qué día malo...

Pró non tanto. Hoi, el Congreso dos deputaos, aló en Madrid, vai tramitar a reciprocidá das televisióis autonómicas nas comunidades vecías.

É así que, pr'Asturias ha chegar a señal da Televisión de Galicia y pras terras de León a da RTPA. Bó, técnicamente chegará a señal da TvG aquí unde falen galego-asturiano y a da RTPA ás partes de León unde aínda falen asturleonés.

Y é pra min úa búa noticia.

Tamén, y pode qu'agora nun señan os temos máis indicados, era guapo qu'a RTPA touvera úa canal íntegra n'asturiano, y desconexióis en galego-asturiano, que xa vi dalgo de teatro, peró é muito pouco.

Por suposto, ás zonas de León y Zamora que mantenen a lingua galega yes chegará a TVG, y por Galicia verán a Televisión portuguesa.

Ai, afortunadamente a Televisión de Castela y León nun vai chegar a súa señal a Asturias, polo menos en principio. Y tou alegre, máis, y esto quede ben claro, que nun é úa falta de respeto a os meus amigos leoneses nin máis castelaos, sinon porque a televisión de Castela y León é úa televisión privada, y pra eso xa temos úas cuantas: A Terceira, Telecinco, A Sexta... y por nun dicir nada das da TDT...

¡¡¡A sorte que teño que nun veo a TV!!!



Pd. Como sempre a nova mala ven porque catalán/valenciano nun é a mesma lingua dende un punto político/legal. É úa pena, y asina as señales da TV3 nin de Canal 9 van poder verse nas autonomías de Valencia y Cataluña respectivamente, agá que sí poda verse a TV3 n'Aragón.

Siguen los ataques a la política llingüística asturiana

¡¡¡Tán llocos col asturianu!!!

Agora tocó-y auḷḷar a Intereconomía. Y trátase del Niemeyer, el monumental sitiu avilesín de la cultura, construyíu pola empresa pública asturiana SEDES, de titularidá autonómica, solvente, y que la derechona nun ve momentu pa privatizar.

Intereconomía miente al referise al Conseyeru d'Educación y Deporte del Principáu, porque diz que la so esmolición cimera ta na defensa de la llingua asturiana, cuando ye, amás de la defensa de la llingua asturiana la promoción del patrimoniu monumental asturianu.

Pero, non fartos col llevantu y la manipulación, enfrentan la llingua asturiana cola "universalidá del Niemeyer".

Pero vamos ver, zoucanes, ¿Qué ye que la llingua asturiana ye menos universal que'l Niemeyer que construyimos los asturianos cola profesionalidá de SEDES?

Cuido que lo que de xuru sía tornar a la corte los gochos sía char una hora diaria na tele viendo la puta mierda d'Intereconomía, por reaccionarios, faltosonos ya mentirosonos. Que dan puta pena.

Éso sí, prehí los verás agora pidiendo porque nun tienen nin pa mandar a un ciegu tocar, porque llámanse Intereconomía, pero aquello debe ser una putu desastre.

Lo gracioso de too ye que yo soi del Wyoming, y disfruto como un tontu cuando los humilla ehí pela tele. Ḥa ḥa ¡qué gustu!

Mundu Ruraliegu edición especial: Asturias gasta perras asgaya nel bable, según LA RAZON

Vaya hom. Acababamos xusto agora de dicir qu'Esperanza Aguirre nun sabe facer la o con un canutu, cuando Madril vuelve a la carga: "Dichosos asturianos que están empeñados en hablar bable y gallego-asturiano... ¿Qué es que no os gusta el castellano?".

¿Queréis creer que, hasta que vi lo d'Aguirre, taba a puntu de poneme a escribir nuna llingua seria como la castellana? Lo que pasa yía que llueo ví las parvalladas que ponía LA RAZON, ya dixe... "Bah, tan seria nun yía."

Non home non. La llingua castellana nun tien nengún problema ho. Yá bastante la machacóu l'outru día Esperanza Aguirre, dende'l sou puestu de presidenta de Madril. Vaya camada que-y deu... Si Lope de Vega alza la cabeza...

Pues sí hom. Esprecetóu todu un periodista (anque bono, periodismu, periodismu... foi más bien un intentu d'ataque frontal a la llingua ya a Asturias, pero touvo de patinar) por mor de las axudas que recibíu del Principáu las diferentes asociaciones ya empresas polos sous proxectos al rodiu la llingua asturiana. Lo que se llaman tamién subvenciones, ya que tan mal vistas tán pola xente que nun las recibe ya sólo se dedica a nun trabayar ya queixar prehí.

Conque Fernando Cancio -que sí ho, apellidase asina, canciu- ta'l probe qu'echa fumu. Pa él las faltas d'ortografía d'Aguirre son peccata minuta, porque claro, polo menos la paisana inténtalo, ya nun fala llinguas raras, cumo'l gallego-asturianu ya inda más l'asturianu.

Pa empezar, a Fernando Cantarinos (hai xente a la que nun-y presta la palabra "canciu"; a min la verdá que si me presta tamién, pero cumo nun quiero ofendellos pues puengo cantarinos, que yía, paez ser, una forma más correuta) estorba-y que'l Gobiernu Asturianu gaste


Un total de 189.000 euros para promover el libro asturiano y la traducción de obras asturianas

Normal. Llou, si s'espublizan los llibros, entós hai que lleellos, ya imaxinái la d'opiniones heterodoxas, dubidas ya destierru de falsos mitos, que too ello feichu  cumo batulax ya mal dixeríu ya devueltu metanes, van entrando ya saliendo nas mentes de la vecería.... ¡Ui que miéu! Meyor nun lléais. ¡Vei la tele! ¡Intereconomía! Esperanza Aguirre, por exemplu, nun yía que nun tea una Dirección Xeneral de Política Llingüística, sinon qu'ella direutamente nun llee. Poro, llou tien faltas. Ya'l sol sigui xirando en torno a La Tierra.


Un mes después, convocaba otros 579.600 euros para financiar la realización de estudios «en o sobre el asturiano y el gallego asturiano»

Sigui, fuertemente, el probe Cantarinos asouriando. 580.000 eiros, numái ya námenos que pa estudiar... Ya digo you, ¿pa qué? ¿Pa qué estudiar? Eto'o gana 20 millones d'eiros al añu ensin tener falta d'estudiar nin garrar un llibru pa nada. Neños, nun m'estudiar. Nun vaiga ser...


Ah, non. Doume cuenta agora. Yía que, nun penséis, tampouco you tanto estudiéi, ya claro, éso nótase.


Son pa la investigación. You pa investigar garraba los cuartos ya mandaba a Cantarinos ya con él al editor de LA RAZÓN de paséu a la Lluna, ya asina cubríamos cumo si la cousa fora una investigación... "¡Ai perái, que se corta esto! ¡Qué nun hai llinia! ¡Tinéu, tenemos un problema!" Ya darréu dalgún queda pola Lluna, pensando que qué bien gastaban más cuartos en facer estudios pa que las cousas foran meyor, en vez de tanto queixar...


ya han sido concedidas las correspondientes a promoción de libros (171.000 euros), la de estudios sobre asturiano (18.000), la destinada a medios de comunicación (373.499), la de cine (22.500) y la de obras musicales (40.499 euros).

Vamos ver ho. Too esto aforrábase con una edición de Gran Hermanu ou un reality show similar. Pero non, los asturianos necios ya testeirones, cola sua zuna de lleer, estudiar, comunicase ya crear arte. Pero cómo se pue ser tan demodé. "jo, en Madrid esto no pasa".


Bono, préstame ver que LA RAZÓN nun tien en realidá nada especial contra l'asturianu, sinon que-y resqueima cualquier llingua -que nun sía la española, claro- ya fai tamién (bono, intenta faer) col catalán ya con outras llinguas febles (refierome a llinguas ensin armada nin exércitu; la catalana solo tien a los Mossos, nós nin siquier, tenemos sólo Unidaes Ascrites de la Policía Nacional... que yía dalgo yá).


You nel fondu, afáyome con cousas cumo éstas. Dan-y gracia al tiempu inestable asturianu, ya bono, ríse ún un pouco. ¡Quién vería a Cantarinos escribiendo l'artículu! Una de duas, ou lo escribía apretando los dientes ou cola cara nel suelu de vergoña.... Ḥoḥo, lo primeiro, por Dious, lo primeiro.


Lo malo de todo, yía que LA RAZÓN yía un periódicu de freakies, que n'Asturias nun llee naide. Teo miéu que nun llegue a los estancos, colo que yía cumo si nun s'escribiera nada, ya LNE vei bien fartuca col tema ésti, porque yía quién más cobra por esti conceptu... Pero tranquilos qu'andan metíos a xuicios col Presidente Cascos, ya van gastar los cuartos de la subvención pol bable en xuicios.  Yá yera hora que daquién-ys punxiera la mano enriba, sí señor.










Pd. A ver cuando en LA RAZÓN alzan la voz pa denunciar cousas cumo ésta ou cumo esta outra en vez de gastar cuartos en, por exemplu, poner un logopeda pa Esperanza Aguirre ya una tila pal editor del panfletacu madrilán.

Esperanza Aguirre tien problemes d'ortografía col español

Aínda salió'l datu, nel diariu Público, que l'Estáu Español tien 1.000.000 analfabetos.

Y qué conste que yo nun lo faigo nada mal. Sólo lleo lletres grandes, que nun tean mui pegadines, y si hai pel mediu debuxos. Sinon ¡Quién puede ho!

Pa min lleer ye, como too. Presta si sabes, si nun sabes... ¿Cómo sabes si presta? Entá remembro como, de neñu, yo nun sabía lleer. Y yo como si nada, ¿eh? Tranquilu total. Siempre fui una persona tranquila.

De facto, nin siquier m'entrugaron p'aprendeme a lleer. Ehí llegó la mayestra y p'alantre colas vocales primero, y colo demás depués. Y empecé coles cartiyes de Lamela, que taben guapes. Cuando yá lleía un poco una tía mía mayestra regalóme'l llibru ¿Ónde ta Llunarín? Y depués escomencipié a lleer na mio llingua. ¡Qué guapo!



Claro qu'eso nós, equí, n'Asturies. Cuando sales d'Asturies y vas a provincies la cosa cambia.




La presidenta de la comunidá na que ta'l pueblón de Madril -nin siquier ye ciudá- paez ser qu'escribió una lletra a los mayestros -educación ta tresfería, pero esto fai pensar qu'igual había que tornar les competencies... a Madril- na que ponía delles faltes d'ortografía. Pero non, nun yera pa ver si sabíen ú taben les faltes, pa entrenase pa correxir, ensinon que les faltes taben ehí, tragoles la primera, l'Aguirre.

Probina Aguirre. Claro, como Madril nun tien llingua propia -a parte del castellán- entós anden asina. Y eso que choca, porque bien qu'echen pa contra'l catalán, porque la Generalitat da-y por fomentalo. ¡Hai que falar catalán en Cataluña! Dicen dalgunos.

Ésto too solucionábase unviando les circulares vinientes pa la nuesa Dirección Xeneral de Política Llingüística, pa que los nuesos filólogos corrixeren y llograren testos con claro valir llingüísticu.

Bono, y ¿úlos los d'Intereconomía que falen de que los neños de les comunidaes billingües tienen problemes cola llingua castellana? Si los presidente de les propies comunidaes unillingües tienen los sos problemes.

Ai non, qu'Aguirre ye "presidentesa".

Non home non, lo que pasa ye qu'Esperanza vien p'Asturies a ver los toros, col Dóberman y Moriyón, y entós pégase-y l'acentu y la llingua, y entós llega ehí a Madril y diz: "¡Gaḷḷardón!, ¡Qué gaḷḷu sos!, ¿veite cúmo?" Y ehí diz-y yá'l Conseyeru d'Educación de Madril: "Pero presi, que la ha pasao ahora que se ha estao unos días por A'turias?" Y ella, por cuenta de retrucar aínda n'español suelta "¡Cúmo tais prehiquí... ! ¡Miánicas, que paeceis copinos... ! Vou facer una ḷḷetra pa poner esto a andar que si non..."

Y los cazurronos glayen, col corazón nun puñu: "¡Nos la han cambiado!" Y en vez de ponese contentos, atristayen y quexen con un "Jo, te diré".

Yo la verdá qu'entiendolo. Y nun fai falta tener calletre abondo, pero cuando sientes a un madrilan falar, claro normal. Entrente ganes d'esfarrapar la llingua de Cervantes....

Pero, vaya ho, eso nós. Cola de chorraes nes que la Comunidá de Madril gasta los cuartos, taba bien que se punxeren cursos -non yá d'asturianu o asturllionés- sinon de castellán. Porque yá lo dixe n'otru insiertu míu perende, fabes -o garbanzos pa esti casu- cuécenles per tolos llaos.

Que conste que, por munches faltes que tea Esperanza Aguirre, yo nun la considero una faltosa. Sicasí, güei los que fomos neños per Galicia, Asturies, Lleón, Euskal Herria, el Pirineo Aragonés y los países catalanes... sorrimos un poco, y rímonos otro poco más per dientro de la zuquinería del nacionalismu glotocida español más babayu. ¡Qué fadríamos ensin ellos!

Oito de Setembre de 2011

Outro ano máis é a festa d'Asturias. El Oito de Setembre.

Hai unha leyenda pral Oriente asturiano que xa nun recordo muito ben, peró que dicía daqué d'un mozo que tía vacas y qu'os mouros yas mataran, y foi por eso que nun monte emboscóulos (un monte que xa nun recordo el sou nome tampouco) y soltóu úos troncos d'árboles que arrollóu a tódolo qu'había por aí. (El mozo érache el Rei -Princeps ente os ástures- Pelayo).

Este ano el Principado escoyéu Amieva, precisamente nel Oriente, nas montañas non mui llonxe de Cuadonga. Peró xa houbo celebracióis por todo el país: Acórdome en Trevías, acórdome en Pravia, en Cuideiru, en Navia...

Sí, sobre todo celebraron a festa pral Occidente.


¿Qué quer decir esta efeméride? Bó, ten de lembrar a batalla de Cuadonga, peró máis qu'eso -aínda nun se sabe con certeza como foi aquelo-  foi el nacimento d'Asturias.

Os mouros chenaban a península ibérica, elos tían taifas mouras, y quedabayes Asturias. Entóis os albióis (galaicos), os paesci y os luggoni (ástures) y os vadiniensi (cántabros) daqué latinizaos -por Roma-, daqué menos xermanizaos -polos Suevos-, y había que ver cómo de celtizaos -pola Sede de Britonia, as abadías celtas de Galicia y Asturias- foron xuntando contra los mouros y creando Asturias, deixando de ser galaico-romanos, asturromanos, cantabrorromanos y siendo asturianos, por acio da creación del Reino d'Asturias.

Elo nun quer decir que tolos ástures, tolos galaicos nin tolos cántabros señan hoi os antepasados dos asturianos nin que nós síamos "a súa evolución lóxica". Non, porque somos outra cousa nova. Tampouco somos romanos, nin suevos nin muito menos celtas.

Asturianos. Heredeiros da lingua latina. Heredeiros da Igrexa católica apostólica y celta, como dicía el xenial músico pixuetu Fernando Largo. Y con muitas cousas xermánicas, anque eso nun seña tan lembrado, peró ai tán a organización en parroquias, como en Portugal, que quiciabes seña da orixe xermánica, ou a nosa gastronomía, que mediterrania nun é... Gustaríame saber cuánto yes debemos n'Asturias á herencia xermánica. A Cruz da Victoria y a Dos Ánxeles poderían ser unha pista.

Craro é que muitas cousas solápanse, adhiérense y evolucionan: pró pra min Asturias é un país que foi solaz das tribus ou as gens prerromanas galaicas, ástures y cántabras, fruto da romanización intensa, y dos aportes suevos y britóis, que forman lo qu'hoi é, y celebramos, Asturias.

Por eso, penso qu'hoi é el día -con ou sin as connotacióis relixosas- en que celebramos el nacimento del Poblo Asturiano -na forma de reino altomedieval, peró eso xa... é outra historia.

¡En tolos llaos cuecen fabes!

Yá me lo dixera fai yá tiempu una amiga mía "Cousas verás mundu alantre". Y foi verdá.

A lo primero foron los británicos, que como nós, tamién cuecen fabes. A min dixeronmelo; yo creílo y ehí quedara la cosa.

Pero llueu vienieron los franceses, y bono, pal sur de Francia, pa la Occitania ehí preparen la so Cassoulet, que ye una fabada pero más pijotera, más occitana.

Y llueu, vilo. Lo de los ingleses. Y entós sí me costara creelo.

Resulta que los ingleses, les fabes almuercenles. Sí, como suena.

Ellos faenles estofaes y con una especie de salsa de tomate, si se pue llamar asina, o una mierda parecida d'eses que faen los ingleses, y bono, comen depués llueu. Prometo que faen eso, y que lo desayunen.

Sí, en tolos llaos cuecen les fabes.




Fora d'Asturias, na ciudá d'Uvieo tamién cuecen, nun sé si fabes, pero polo menos dalgo tamién cuecen.

Y ye que ye de chiste, como non, el premiu Principiegu de la Concordia axuntó a Gabino de Lorenzo col Dóberman. Non, nun pudo ser otru. Foi el de la Concordia.

Bono, y eso qu'agora na Corte (de Madril, non de los gochos) falen de reformar la constitución pa ver hasta cuando se pue empufar l'Estáu. Y pa eso acoriquen bien PPSOE (más la UPN). Pero cuidáu qu'ehí ta al llegar FAC, col Dóberman de nuevu.

Si ye que lo toi viendo. La FSA-PSOE va presentase tamién per Madril, y de cabeza de llista va dir el Gochu Fartón, qu'ehí lu tienen si non paráu. Y eso nun ye pa él.

Pola cueta ehí tenemos a Carme Moriyón, l'alcaldesa de Xixón, que paez un personax fascinante.

Ella ye como una monxina. Agora cortó'l grifu a la Universidá de L'Habana. Ehí con dos... bono con altes dosis de testosterona. Anda, lo que quita pa los comunistes que lo gaste en toros. Que total faen guapu.

Bono, Izquierda Xunida, la esquierda d'Asturies, ehí va llucir bien nel 20N con Llamazares. ¿Y queréis creer que nun ye un home que me caiga mal? Veis, yo tamién soi más raru que la mierda...

Por siguir dando un repasu en xeneral, ehí ta'l 8 setiembre. La esquierda nacionaliega representada por BA-UNA diz que van facer un actu xunitariu que va xuntar munchos más asturianos qu'asturianes, o dalgo asina. En fin, suerte-ys deseo. Yo que nun se manque naide. Y si eso, qu'usen profilácticos adecuadamente. Pero que tengan cuidáu, que pue afogase dalguno con eses coses.

Andecha Astur va xuntar col Partíu Asturianista, y van anuncialo'l día 8 Setiembre. (Los de la URAS nun saben nada, pero bono. Tampoco tal...) Van presentar pal 20N a Xuan Xosé, a ver si lo dexen una temporadina en Madril de deputáu. Equí queda Javier Cubero, de mandamás d'AA y del PAS. ¡Ai quién lu vería!

Lo que sí que me va prestar ye qu'UPyD nun va sacar nada, y a ver si dexa polo menos bien de cuartos na so campaña electoral equí n'Asturies. Qu'a min bien que me presta'l rosa esi. Mirái como será que cuando salí del armariu (la segunda vez, la primera ye otra anécdota) quixe volver entrar, pero echáronme. Ye lo bono d'UPyD. Polo menos los homosexuales identifíquense con ellos, énte esi sector podíen tener tirada... Pero nun-ylo digais a Rosa Díez, que ¡ser homosexual nun ye ser español!





En fin, yo lo d'almorzar les fabes como que nun lo veo.

Alcaldesas

¡Ái, qué aburríos somos nel País de la Pandereta ésti!

Pero yía una custión de sensibilidá. Ya nesto los asturianos, cumo somos de pueblu nun tenemos; numái una sensibilidá mui primaria.

Poro, cuando Carme Moriyón trabaya -dende que sal del sou puestu d'Alcaldesa en Xixón, con dedicación esclusiva- ya nel sou tiempu llibre opera, la prensa amariella (LNE) arma una escandalera. Esto yía, somos asina. Nel sou tiempu llibre Carme Moriyón tien que xugar al golf ou facer macramé.

¿Qué yía la sensibilidá? Homo ho, d'esto los europeos saben muncho.

Outra alcaldesa, bélxica, foi a un Castiellu, pero non al de Salas, sinon al d'Olite, Navarra. Ya claro, véu too aquello, ya inspiróuse. Ya taba col home, que tamién taba inspiráu. Ya, anque nun había aire, metéuse-y dalgo nel ueyu. Nun me malintreprestar por favor. Fora un mosquitu. Pero cumo se pouxo toda gayolera, ya taba inspirada pol tema'l castiellu ya las vistas, ya yía milenta veces más sensible que Carme Moriyón ya tola xente del Mundu Ruraliegu, ya tenía cerca al home pues bono....

¡Amirái que bien gasta'l tiempu l'alcaldesa bélxica! Non cumo outras, operando, prehí....

¡Zas en tola bouca! Non, nun me malintrepretar por favor. Ella taba mirando pa Zanzabornín, bono, ta bien yá ¿eh? El casu foi que... Cuoñu, ¡¡¡eso yía sensiblidá que pa eso somos europeos!!!

El casu de Moriyón yía más sangrante, porque ella opera. Eso nun almite dulda nenguna.

Por cierto, el castiellu nun yera'l de Salas nin el de Doriga; fora áu taba la corte de los Reis de Navarra antes de la unión con Bélxica, digo con Castiella.



"¡Parece que hace buen tiempo!" diz una tertuliana... Hahaha ¡Qué-ylo pregunten al paisanu! Non, ya'l que grabóu sintíu al paisanu entrugar a l'alcaldesa bélxica : "¿¡Ves Corniana!?" ya ella xuxuriaba "¡Veo La Espina ya hasta Brañaḷḷonga ya la parte Ḷḷaviu ya los pueblos Maeza!"

Buó, ya lo meyor foi la rempuesta de l'alcaldesa bélxica: "Nun teo nada que dicir, yía un actu privadu, nun tien relevancia política". (Ésto eiquí nun se sabe, pero los bélxicos llevannos años de ventaya, ya cumo ellos nun tienen tampouco cuartos agora, ya nun aprueban presupuestos porque touvieron un añu ensin gobiernu, pues nun tienen fiestas pa esti añu, ya por eso sacan el vidiu, pa entretener a los vecinos....)

A min tamién me lo paez. Bona rempuesta, seique, tamién pa l'alcaldesa de Xixón. Ehí pouxienon-yla a güevu.